අගෝස්තු 16..

අද තමයි ඒ දවස. උනුසුම් හාදුවකින් අපි වෙන් වුනු. ජීවිතේ එක තැනක තියල කාලයට ඉඩ දුන්නු. නොසන්සිඳෙන උමතුවක හදවත අතරමං කරපු..

හැම සතියෙ දවසකම නොවැරදීම මේ කොළඹ අහස යට අපි හමු වුනා. ඒක සුන්දර අතීතයක් නොවුනත් සුන්දර මතකයක්. ආයෙ අලුත් නොවෙන මතකයක්.

හිස් වචන ගොඩක් එකතු කරල මං මේ ගලපන්නෙ ඇස් වලට දරන්න බැරි වේදනාවක්. කාලයත් එක්ක අපේ ජීවිත කොයි තරම් නම් වැරදුනාද.. වරද උඹේද මගේද කියලවත් හිතන්න බැරි තැනක අද අපි නතර වෙලා. 

මට මේ පාලුව හුරු නෑ..

අදටත් අපි ඉඳ හිට මගදි හම්බෙනව. මූන බලල හිනා වෙන්න තරම් වත් ඒ වෙලාවෙදි මගෙ හිත හයිය නෑ.. මට ඕනෙ උනේ උඹත් ඒ වෙලාවෙදි දුක් වෙනව දකින්න. ඒත් මට එහෙම දෙයක් දැනෙන්නෙ නෑ..

ඉස්සර උඹ ආසම උන විදිය.. මගේ පපුවට ඔලුව තියන් ගොඩක් වෙලා ඉන්න.. මට ඕනෙ ආයෙත් පොඩි වෙලාවකට ඒ මොහොතට යන්න. ඒත් ආයෙ එන්නෙ නැති ජීවිත කතාවක් වෙන්න තරම් අපේ ආදරේ කෙලවරක් වෙලා..

ජීවිතේ අලුත් බලාපොරොත්තු නැත්තෙ නෑ. ඒත් පුංචියට හරි හිතේ තදටම තියෙන බලාපොරොත්තුව උඹ. උඹට මේ වචන දැනෙන්නෙ නැති වෙයි. මට තරම්..

ඒත් මට ඕනෙ මට දැනෙන්න.. උඹට දැනෙන වග…

ඉතින්..

අගෝස්තු 16..

අද තමයි ඒ දවස. උනුසුම් හාදුවකින් අපි වෙන් වුනු. ජීවිතේ එක තැනක තියල අපි කාලයට ඉඩ දුන්නු. නොසන්සිඳෙන උමතුවක හදවත අතරමං කරපු.. ❤

-නෙත්මි-

මගේ වගේම උඹෙත් ඇස් අඩු නැතිව තෙමුව අපේ සෙනෙහසට දැන් හුස්ම ගන්න බැරි ගානටම වයසයි. හැම දවසකම කාටත් හොරෙන් අපි අපිව මතක් කරපු හැටි. උඹේ ආදරේ මගේ හිතේ එහෙම්මමයි..

ඔව්.. උඹට මතකද දන්නෙ නෑ.. ඉඳ හිට අපි අපේ ගෙදර වැටට එහා පාර දිගේ අත් අල්ලන් ගිය හැටි. ඒ පුංචි වෙලාව ඇතුලෙ අප්‍රමාණ සෙනෙහසක් තැන්පත් වෙලා තිබුණා.. ඔව්.. අපි නොසෑහෙන්න ආදරේ කලා. මනුස්ස හදවතකට දරන්න බැරි තරමටම.. කාලයත් එක්ක අපේ ජීවිත මෙච්චරයි කියල කියන්න බැරි ගානට වෙනස් උනා.. ඔව්.. අපේ ජීවිත, වටිනාකම්, මේ හැම දෙයක්ම අද වෙනස් වෙලා. ඒත් උඹ දන්නවද දෙයක්? 

තවම අහසෙ පායන්නෙ මං එදා උඹට පෙන්නල ඔච්චම් කරපු ඒ හඳමයි.. තවම මේ පරිසරයෙ දැනෙන්නෙ උඹ ළඟ ඉද්දි එදා දැනුන උණුසුමමයි.. තවම රෑ හීන වලට එන්නෙ එදා ආව උඹමයි..

කාලයත් එක්ක අපිව අතීතෙට එකතු වෙලා.. ජීවිතයක් කරගත්තු ආදරෙත් දැන් නැතිව ඉන්න හුරු වෙලා..

ඒත්.. තවම හැඟීම් පරණ වෙලා නෑ.. උඹව ආයෙ දකින්න, උඹේ කටහඬ අහන්න, අන්තිම හුස්ම යන්න කලින් උඹ ගාව එක පාරක්, තවත් එක පාරක් තුරුල් වෙන්න මට ආසයි.. මේ කවිය උඹටයි ලිව්වෙ කියන්න, උඹ වයසට ගිහින් කියල හිනා වෙන්න, 

ඔව්.. ඒත් උඹට කලින් මැරෙන්න ආසයි…

මං අදත් බලන් ඉන්නව.. මේ වැට පුරාම අදටත් මල් පිරිලා. ඒ අතරින් මං බලන් ඉන්නව. අත් අල්ලගත්තු හිනා මූණු ඈතින් යන හැටි මට පේනව…

තව... මං දකිනව…

අපිත්...💕

-නෙත්මි-

කාලය හරි ඉක්මනින් ගෙවිල ගිහින්. උඹ, මම, අපි දැන් ගෙවන්නෙ වෙනස් ජීවිත. අපිට යන්න උනේ ඉර එළිය බින්දුවක් වත් නොවැටුණු අඳුරු මාවතක. මට පාර පෙන්නුවෙ උඹ. අපි අමාරුවෙන් කෙලවරක් හෙව්වත් අපිටත් හොරෙන් අපේ ජීවිත අපිට සින්න වෙලා ගියා.. 

උඹට මතකද? හිත් වලට දරන්න බැරි කතා අපිට කොයි තරම් නම් තිබුනද.. යන්තමට අපේ මාවතේ දල්වල තිබුණු එලියකින් පාර හොයාගෙන අපි කෙලවරක් හොයන්න කොයි තරම් නම් උත්සහ කලාද..

ඒත් උඹ නැවතුනා..

මාවත උඹට අඳුරු වැඩි උනා..
මං තනියම අතරමග දාල උඹ ආපහු හැරුණ..
ඒත් මට දැන් තනියම පාර හොයාගන්න බෑ..

ඉතින්... 

පාර තවම එළියයි...

උඹ ආයෙ එනවද?

-නෙත්මි-

එන්න..
අපි යමු ඒ අතීතෙට
අලුතින් ලියමු මේ කතාව
සෙනෙහසකට නොව
මිතුදමකට..
සුන්දර කෙළවරක් දකින්නට..

-නෙත්මි-

උඹ මාව තුරුල් කරගත්ත..

කාලය නැවතිලා. මට දැනුනෙ මේ මං හුස්ම ගන්න අන්තිම තප්පරේ කියල. එහෙම්මම මට ඒ හීනෙන් ඇහැරුණා. උඹ මගෙ ළඟ හිටියෙ නෑ. හීන කොයි තරම් නපුරුද. එලියෙ වැහි අඳුර එක්ක ලා හීතලට නැවතුමක් නැතුව ඉපදුනු මගේ කඳුලු වලට උඹේ මතක තප්පරේට දාස් ගානක් එකතු උනා. උඹට මතකද? මං උඹට ආදරේ කරපු තරම්.. උඹේ ඇස් වලට නොනැවතී කඳුලු දුන්නු දවස් වලට වඩා ඒ දවස් කොයි තරම් ලස්සනද..

මං අද හිනා වෙනව කියල උඹට පේනව ඇති. හිනාව ඇස් වලින් මනින්න බැරි වග උඹ දන්නවද? හදවතක් නොමරා මරන ආදරේ නිසා අද ජීවිතේ අතරමගක නැවතිලා. හැම තප්පරේම මගේ මතකෙට ආව උඹව මට හැම තප්පරේදිම අමතක කරන්න වෙලා. මට ආසයි ඒ අතීතෙට යන්න. ආයෙම. ඒ නැවතුනු හිනාව, උඹේ අව්‍යාජ සෙනෙහස, අපේ අහින්සක හීන ආයෙම දකින්න. එක තප්පරයක් උඹට තුරුල් වෙන්න. මැරෙන්න කලින් ආයෙම මොහොතකට ජීවත් වෙන්න. කෙටි පණිවිඩයක් එද්දි උඹ කියල හිතිල එක පාරටම හිනා වෙන්න.. ආයෙ නොඑන අතීතෙකට යන්න මට ආසයි.

මුලු ලෝකයක් වෛර කලත් ඒ ජීවිතේ කොයි තරම් ලස්සනද. සීසීකඩ ගිහින් අතරමං වෙච්ච ජීවිත දෙකක් වෙලා අද අපි දෙතැනක. උඹ දන්නවද? මමත් හීන දකිනව. වෙනස් විදියට. මමත් ජීවත් වෙනව. වෙනස් විදියට.. මමත් හිනා වෙනව. වෙනස් විදියට..

ඒත් මං ආසම ඒ ඉස්සර විදියට..

හැම රෑකම මං හීන දකිනව. හැබෑ ලෝකෙදි නොපෙනෙන හීන.. දකින්න අවසර නැති හීන. ඒ ලෝකෙ පිටස්තරයො නෑ..

හැම හීනෙකම හිටියෙ උඹ විතරයි..

උඹ මාව තුරුල් කරගත්ත... ❤

-නෙත්මි-